Wel, Wiskunde was nog nooit my sterk punt nie, maar ek ken darem  die basiese beginsels.  Die lewe vereis Wiskunde, veral rekenkunde soos ons in die outyd optel, aftrek, maal en deel genoem het.  Ek kan meet en pas, naaldwerk doen met mates, bankrekeninge nagaan, uitgawes dophou en pryse onthou sodat ek goeie koopbesluite maak.  Ek speel altyd ‘n speletjie met myself as ek die supermarktrollie kassier toe aanstoot om ‘n rowwe skatting van die totaal te maak. Ek hou daarvan as ek net naby reg is.

Ons het al gesels oor Bybels syfers. Wiskundiges is opgewonde as mens syfers praat.  Dit is hulle taal. Die Bybel skram nie weg van syfers, mate en berekeninge nie, al is dit ‘n antieke geskrif en ons dinge dalk heeltemal anders as hulle sou kon verstaan.  Die ark is volgens mates gebou, wat in die moderne tyd nagemaak en korrek bevind is.  Die Tabernakel is volgens God se mates gemaak, met streng voorskrifte oor die versiering en afronding daarvan.  Ek het al genoem dat my ma altyd gesêhet: dit maak nie saak hoeveel nulle voor ‘n een is nie. Nulle na die een maak saak. Net so is ‘n lewe saam met Jesus. Hy is die EEN en al is jou lewe ‘n niks, nadat jy hom in jou lewe ingenooi het, maak al die nulle van jou lewe jou waarde onberekenbaar.

Ons het eintlik nog nooit in Bodemklippe oor die huwelik gepraat nie, maar dikwels oor verhoudings.  Ons het ookal voorheen beklemtoon hoe belangrik verhoudings, veral gelukkige en gesonde verhoudings in die bepaling van ‘n mens se geluk is.  Jy leef in verhouding elke dag, al is jy alleen en ongebonde.  Jy is gebore in familie en leef in gemeenskap en dit bepaal in ‘n groot mate jou innerlike vergenoegdheid en blymoedigheid.

Dit is egter so dat Bybelse rekene nie heeltemal soos ons aardse rekene werk nie.   God is een, maar bestaan uit drie.  Die mens is een wese maar word beskryf as gees, siel en liggaam.  Die syfer drie in die Bybel dui altyd op volledigheid en volmaaktheid.

So skryf Paulus oor die belangrikste drie basiese beginsels vir die Christendom – geloof, hoop en liefde (1 Korintiërs 13). Jesus praat oor die drie beginsels wat ‘n lewe sterk maak – gebed, vas en gee (Matteus 6).

Hierdie jaar het ek en my man ons 35 jaar huweliksherdenking gevier.  Sonder twyfel is dit die beste 35 jaar van my lewe en ek het nog altyd ‘n veilige hawe en ‘n sterk vesting in my verhouding met hom en in die huis wat ons saam opgebou het, gevind.  Maar ek weet baie goed dit is nie omdat dit ons is nie.  Dit is nie omdat ons goeie mense is nie of omdat ons toevallig ‘n verhouding van liefde en ‘n sterk innerlike konneksie het nie. Ek weet goed dat ons huwelik funksioneer en floreer met ‘n derde persoon betrokke.  Ons huwelik in Wiskunde se taal is: 1+1+God=1 goeie verhouding.

My dierbare vriendin stuur vir my die volgende skrif as gelukwense en ek het weer besef: Die Bybel sêdit die beste.  Lees saam met my die Woord van God se verhouding-wiskunde!

Twee vaar beter as een. Hulle inspanning kom tot iets.

As die een val, kan die ander hom ophelp. Maar as een val wat alleen is, is daar niemand om hom op te help nie.

As twee langs mekaar slaap, word hulle warm, maar hoe sal een wat alleen is, warm word?

Een alleen kan oorweldig word, twee saam kan weerstand bied.

‘n Driedubbele tou breek nie maklik nie.  (Prediker 4:9-12)

Daar is ‘n ou legende van ‘n man wat sy seuns die beginsels van samewerking en eenheid wou leer.  Hy het ‘n klomp stokkies in ‘n bondel gebind en hulle gevra om die stokkies te breek.  Natuurlik kon hulle nie.  Toe hy die bondeltjie losmaak, kon hulle maklik die individuele stokkies breek.

Ons leef in Christus.  Die kerk van Jesus is gebou op sy Kruis, Opstanding en Hemelvaart – drie kragtige gebeure wat die fondament van die kerk vorm.

Binne die kerk is ons gebind aan Jesus, aan mekaar en aan die Woord van God.  Saam is ons ‘n onoorwinlike weermag in die Koninkryk wat ons wêreld impakteer.  Dit is die hemel se Wiskunde:

Jesus + die Woord + wedergebore mense = die Kerk van Jesus.  Ons oorwinning is gewaarborg in Jesus se dood, opstanding en hemelvaart.

Dit klink soos ‘n goeie leerstelling; ‘n goeie lewensfilosofie.  Jesus het egter nie gesterf vir ‘n lewensfilosofie of patroon van lewe nie. Die beginsels is kragtig en lewensveranderend.  Die Christendom is nie ‘n voorskrif oor die lewe nie – dit is gehele transformasie.

Die beginsels waarvan ons hier praat is radikaal en geweldig.

As ‘n mens onderwerp aan geloof, hoop en liefde verander jou lewenspad op die mees fundamentele vlak moontlik.  Dit verander jou lewe en jou dood – absoluut alles wat in en om jou is.  Jou besluit om Jesus te volg het ‘n impak op jou innerlike wese en denke, jou omstandighede en die mense om jou.  Jy draai die skip; jy verander jou koers; jy verander die koers van jou hele nageslag.

Jou besluit vir Jesus sal die lewenskoers van jou kindskinders wat jy nooit eers hier op aarde sal ontmoet nie, verander, verbeter en verlig.

Is dit nie iets om oor te juig nie?

Ons kan bietjie verder dink oor Wiskunde in ons wêreld.  Ons kan lees oor die Fibonacci-stelling waarvolgens die volgorde van die simmetrie van ‘n sonneblom se sade numeries uitgedruk word.  Die volgorde word bepaal van een af met die som van die vorige twee syfers: 1, 2, 3, 5, 8, 13, 21, 34, 55, ens.  Baie plante kan met die volgorde beskryf word.  Dis een van die redes waarom ‘n vier-blaar klawer so moeilik is om te vind.

Nog ‘n voorbeeld is die goue ratio.  Dit word uitgedruk in die syfers 1.618 en die Griekse letter phi (Φ).  Dit word by benadering uitgewerk met die Fibonacci-stelling.

Die wetenskaplikes wys op al hierdie simmetrie en voorspelbaarheid om die wonder van patrone in die natuur uit te druk.  Hulle vra ook natuurlik die vraag waarom dit so bereken kan word.

Die antwoord daarop is doeltreffendheid.  Die sonneblom kan die maksimum hoeveelheid saad in die blom produseer as die skeiding tussen die sade ‘n hoek vorm wat op ‘n irrasionele getal baseer is.

Dink net hoe die toepassing van God se wiskunde in die natuur seisoen na seisoen, met die goddellike ritme vansaaityd en oestyd, koue en hitte, somer en winter, dag en nag ons lewe op aarde bepaal.  Volgens die dromslag van die Almagtige met goddellike wiskundige presiesie word daar saad vir saaier en brood vir die eter gegee.  (Jesaja 55:10, OAB)

Net so sal God se wiskunde in ons geestelike lewe sorg vir die voeding van ons siele. Die Woord is die saad en Jesus is die Brood van die Lewe.

‘n Verhouding is gelyk aan ek, die ander persoon en God.  Dan is dit ‘n verhouding wat voed en bou.  Dit is hoe dit werk.

In die Koninkryk is dit ek PLUS oneindige getal mede-christene PLUS God IS GELYK AAN die kragtige, onsigbare koninkryk wat effektief die wêreld se nood beantwoord.

GEBED:

Here, ek onderwerp nou myself en al die “onmoontlikhede” van enige verhouding wat my pla onder die gesag van die Heilige Gees en verwag ‘n wonderwerk van God om dit bonatuurlik in hand te neem en tot my voordeel en vreugde op te los.

Die Here sal jou hart verander indien nodig, jou sterk maak en vrede in jou huis en hart en vriendekring bring.