66. Opstandingslig op jou pad.

Besluit jy iets, dan kom dit tot stand; en oor jou weë skyn ‘n lig.

[Job 22: 28]

Paas is afgehandel. April is vakansiemaand. Skoolvakansies en vakansiedae – asemhaal-kans na ‘n besige eerste termyn. Plesier, ontspanning en winterplanne het alle gedagtes aan die Paastyd verdryf. Dit was na alles maar net weer die gewone jaarlikse herdenking van die kruisiging.

Dink net vir ‘n oomblik hoe ‘n gespanne-opwindende tyd hierdie dae na die opstanding vir die volgelinge van Jesus was. Vanaf daardie Sondag wat Maria die dissipels kom roep het en die leë graf ondersoek is, het die nuus versprei. Lees gerus al 50 versies van die triomfantelike Lukas 24. In die 40 dae voor die Hemelvaart het Jesus drie keer aan Sy dissipels verskyn. [Johannes 21:14]

Maria het agtergebly daar in die tuin by die graf en alleen die geleentheid gehad om met Jesus te praat nadat die ander dissipels huis toe gegaan het. Dit was vir haar die hoogste troos wat daar kon wees en een wat haar verwagtinge oortref het. In haar gesprek met Hom is haar pyn en vrees genees. Herstel is gewaarborg in die teenwoordigheid van die Here.

Die dissipels, wat nie gewag het nie, is terug agter die geslote deure van vrees. Johannes 20:19:

En toe dit aand was op daardie eerste dag van die week en die deure waar die dissipels vergader het uit vrees vir die Jode, gesluit was, het Jesus gekom en in hul midde gestaan en aan hulle gesê: Vrede vir julle!

Hy sal jou kom haal, selfs agter die deure van jou vrees en vertwyfeling. Hy het dit gedoen vir Thomas, agt dae later. Spesiaal, sodat Thomas presies dieselfde ondervinding het, as die ander wat Hom gesien het. Kind van die Here, die donkerste dag van die Hemel, wat chaos onder die volgelinge van Jesus gesaai het, het in oorwinning verander toe Jesus verskyn. Net so sal Sy verskyning in jou donkerste dae, die chaos in oorwinning laat verander.

Johannes praat van baie tekens wat Jesus gedoen het, wat nie beskrywe kan word nie. Johannes 20:30.

Ek kan my net voorstel. Die tonge was los, die berigte het versprei, die storie het geloop. Op een of ander stadium het die dissipels Jerusalem verlaat en teruggekeer na die See van Galilea om voort te gaan met die bekendheid van hulle visvangery.

Die beskrywing van Sy verskynings lees soos ‘n spanningsverhaal. Jesus verskyn en verdwyn. Hy stap saam na Emmaus en luister na hulle verwarring en vertwyfeling. Daardie stappers het sekerlik die mees insiggewende teologiese gesprek op die hele aarde gevoer, toe Jesus Homself in die Skrifte aan hulle verduidelik. Selfs na al hierdie superieure lering het hulle oë eers oopgegaan toe Hy die brood breek. Slegs in Sy teenwoordigheid, met Hom aan die tafel sodat Hy self vir jou die Brood van Sy liggaam breek, sal teologie sin maak.

Hulle was nie seker wanneer hulle Hom weer in lewende lywe gaan sien nie. Die dissipels is by die meer, besig met hulle gewone pligte. Petrus gaan visvang en die ander saam met hom, maar hulle vang die hele nag niks nie. Skielik is Hy weer by hulle, op die strand, soos van ouds toe Hy hulle geroep het, maar hulle herken Hom nie dadelik nie. Jesus vra hulle of hulle iets te ete het en hulle antwoord nee. Hy beveel hulle om die net aan die regterkant van die skuit uit te gooi. Sonder omhaal van woorde, met net ‘n eenvoudige opdrag, het hulle ‘n wonderbaarlike oorvloed vis wat hulle uittrek sonder dat die nette skeur. Johannes herken die wonderwerk en verklaar: Dit is die Here. Petrus spring sommer in die see en hardloop uit om vinniger op die strand te kom.

Na ‘n heerlike ontbyt – daar is niks soos vars vis op ‘n vuur op die strand nie – en sekerlik in gesprek met hulle geliefde Jesus wat al die vrees en onsekerheid van die kruisigingstyd verdryf, word die besonderhede van Jesus se gesprek met Petrus fyn beskryf.

Dit word duidelik dat die tyd na die opstanding ‘n tyd van herstel is. Petrus word herstel in vergifnis en liefde sodat hy toegerus is om sy hoë roeping te vervul. Die dissipels se pyn en verwarring na die kruisiging word omskep in oorwinningsvreugde en verwondering.

Handelinge begin met Lukas se saaklike stelling wat die opstanding bevestig.

Handelinge 1:3

 to whom He also presented Himself alive after His suffering by many infallible proofs, being seen by them during forty days and speaking of the things pertaining to the kingdom of God.

Gryp vas aan hierdie waarheid. Ons beleef nou die 40 dae na hemelvaart en dan kom die 10 dae in die bokamer van Pinkster in afwagting op die Heilige Gees. Die Fees van die Weke waarin die eerste vrugte op ‘n oes gevier word.

Dit is ‘n tyd waarin verwarring en vrees vervang word met verwagting en geloof. Dis ‘n tyd wat nuwe insig op jou situasie deur die opgestane Jesus se superieure teologie die oorvloed vis intrek sonder dat die net skeur.

Waar is jou oog? Op die aktiwiteite van ‘n jaar wat voortsleep, alreeds vasgedraai in ‘n warboel van werk wat jou visie verdof.

Dit is weer tyd vir stilte en onderworpe denke.

2 Korintiërs 10:5:

… terwyl ons planne verbreek en elke skans wat opgewerp word teen die kennis van God, en elke gedagte gevange neem tot die gehoorsaamheid aan Christus,

In daardie stilte bid ons Psalm 121:1: Ek lig my oë op…

Dit is net moontlik om God te sien as ons oog reg ingestel is om Hom te herken. Bid saam met die blinde Bartomeus: Here, laat ek kan sien… [Markus 10:51]

Sien jy die wonderlike visvangs? Sien jy Jesus wat op die strand staan en vir jou ontbyt braai? Verhef jou verwagting en kyk wat die Here vir jou doen.

Exodus 14:13

And Moses said to the people, “Do not be afraid. Stand still, and see the salvation of the Lord, which He will accomplish for you today.

Deuteronomium 1:21

Look, the Lord your God has set the land before you; go up and possess it, as the Lord God of your fathers has spoken to you; do not fear or be discouraged.’

Die vermoë van ‘n mens om verkeerd te kyk, is skrikwekkend. So dikwels kan iemand objektief in ‘n ander se situasie inkyk en nie verstaan waarom dinge so verkeerd loop nie. Die manier waarop jy kyk is bepalend en kan jou lewe versuur of versier. Dis in jou mag om die slegte raak te sien en daarop te reageer, net soos dit in jou mag is om die regte dinge raak te sien en met wysheid te reageer – met die vrug van die Heilige Gees, sonder woede en verwyte. Ons word uitgedaag om met liefde en begrip op die gebrokenheid van die wêreld te reageer.

Dit kan goed gaan met jou sonder dat jy dit besef. Sien jy seën raak en leef jy in dankbaarheid met ‘n goddellike bewustheid van voorsiening en beskerming van jou Vader?

Kyk jy die seker tekens van ‘n huwelik wat skeefloop en kinders wat smag na aandag en aanvaarding mis? Dis so maklik en gebeur heeldag. Net die Heilige Gees gee ware insig in jou eie binneste. Hy oortuig van sonde. Laat Hom toe om jou gemoed aan te spreek, bely jou sonde en koop die oogsalf by die Koopman van Openbaring 3:18 sodat jy nie naak, misrabel, blind en arm deur die lewe gaan nie. Jesus sê self: [Matteus 6:22 en 23]

Die lamp van die liggaam is die oog. As jou oog dan reg is, sal jou hele liggaam verlig wees.

Maar as jou oog verkeerd is, sal jou hele liggaam donker wees. As dan die lig in jou donkerheid is, hoe groot is die donkerheid nie!

Wat is genesing vir die verkeerde oog? Die uitdaging is om werklik te sien en diepe insig en kennis te verwerf.

Spreuke 9:10

Die beginsel van die wysheid is die vrees van die HERE, en kennis van die Heilige is verstand.

Ons oog op die Here is sonder twyfel die bron van insig en genesing van die geestlike blindheid waarmee die sorge van die lewe ons sig verdof.

‘n Groot vreugde is om te besef waar God se oog is. Hy verklaar so dikwels in die Skrif waar Sy oog kyk en dat Sy oog op ons ‘n voortreflike lewe verseker.

Psalm 32:8

Ek wil jou onderrig en jou leer aangaande die weg wat jy moet gaan; Ek wil raad gee; my oog sal op jou wees.

My hart roep uit in dankbaarheid vir die versekering dat God se oog op my is.

1 Samuel 9:16

…for I have looked upon My people, because their cry has come to Me.”

1 Samuel 16:7

Kyk nie na sy voorkoms en sy hoë gestalte nie, want Ek ag hom te gering. Want nie wat die méns sien, sien God nie; want die mens sien aan wat voor oë is, maar die HERE sien die hart aan.

God se oog kyk diep – dieper as wat ons ooit kan kyk. Insig in die lewe van ons familie en vriende kan net in die diepste vertroue op die insig van die Heilige Gees wees sodat ons met onvoorwaardelike liefde daarop kan reageer.

2 Kronieke 16:9

… Sy oë deurloop die hele aarde om diegene kragtig te steun wie se hart onverdeeld op Hom gerig is…

Waar is jou oog in hierdie opstandingstyd? Sien jy die opgestane Jesus? Kyk jy met nuwe insig en is jou verwagting sterk genoeg? As jy opkyk sal jy God se oog op jou vang.

Lig jou oog op…

My gunsteling lied oor die opstanding. Don Francisco: He’s Alive.